ប្រេស៊ីល៖ ការប្រកួតវគ្គជម្រុះ World Cup រវាងអាហ្សង់ទីននិងប្រេស៊ីលត្រូវបានផ្អាកដោយសាររឿងរ៉ាវដ៏ចម្រូងចម្រាស់មួយ ពោលគឺក្រោយពេលដែលអាជ្ញាធរសុខាភិបាលប្រេស៊ីល បានចូលមកឃាត់ខ្លួនកីឡាករមួយចំនួនដោយចោទប្រកាន់ថាពួកគេបានបំពានច្បាប់កូវីដ-១៩ ចូលមកក្នុងប្រទេសប្រេស៊ីល។
ការប្រកួតចាប់ផ្តើមបានត្រឹម ៥នាទីប៉ុណ្ណោះ គេសង្កេតឃើញអាជ្ញាធរសុខាភិបាលប្រេស៊ីលបានចូលមកកាន់ទីលាន ដើម្បីបញ្ឈប់ការប្រកួតដោយបាននាំខ្លួនមនុស្សចំនួន ៤រូបដើម្បីធ្វើការសាកសួរ ក្នុងនោះរួមមានអ្នកចាំទីក្លិប Aston Villa កីឡាករ Emiliano Martinez, កីឡាករពីររូបរបស់ Tottenham Hotspurs រួមមាន Cristian Romero និង Giovani Lo Celso ដែលស្ថិតក្នុងជម្រើស ១១នាក់ដំបូង ព្រមទាំងកីឡាករបំរុង Emiliano Buendia របស់ Aston Villa។ គួរឱ្យដឹងថា រដ្ឋាភិបាលប្រេស៊ីល បានដាក់បំរាមមួយក្នុងគោលដៅទប់ស្កាត់ការរាលដាលកូវីដ-១៩ ពោលគឺបុគ្គលដែលមានប្រវត្តិស្នាក់នៅចក្រភពអង់គ្លេស, ឥណ្ឌា ឬអាហ្វ្រិកខាងត្បូងក្នុងអំឡុង ១៤ថ្ងៃចុងក្រោយ មិនត្រូវបានអនុញ្ញាតឱ្យចូលមកកាន់ប្រទេសប្រេស៊ីលឡើយ លើកលែងតែពួកគេជាជនជាតិប្រេស៊ីល ឬមានទីលំនៅក្នុងប្រទេសប្រេស៊ីល។
ភ្លាមៗនោះ ក្រុមភ្ញៀវអាហ្សង់ទីនបានចាកចេញពីទីលាន ដោយនៅសល់តែកីឡាករប្រធានក្រុម Lionel Messi និងអ្នកចាត់ការក្រុមជម្រើសជាតិអាហ្សង់ទីន Lionel Scaloni បានបន្តមានវត្តមាននៅលើទីលានជាមួយក្រុមម្ចាស់ផ្ទះប្រេស៊ីល ដើម្បីពិភាក្សារកដំណោះស្រាយជុំវិញការផ្អាកការប្រកួតនេះ។ Messi បាននិយាយក្រោយបញ្ហានេះថា៖ "ហេតុអ្វីទើបចាប់ផ្តើមការប្រកួតហើយបែរជាបញ្ឈប់វិញ?? ពួកយើងបានមកដល់ប្រេស៊ីលយូរហើយ ហើយក៏បានមកដល់កីឡដ្ឋានប៉ុន្មានម៉ោងហើយដែរ គួរណាស់តែពួកគេផ្អាកតាំងពីប្រកួតមិនទាន់ចាប់ផ្តើម"៕
